Бильмем,

ничюн, ярдым этмез иляджлар манъа.

О майыс геджеси кене къозгъала.

Юрегим чапалана, къанларгъа булана,

Къальбимде афатлы еллер сызгъыра.

Даяналмам, акълыма тюшсе, анам,

Тазертме къанлы ярамны, ялварам.

Къан къуса ярам, атешлерде янам,

Даяналмам, акълыма тюшсе, анам.

Хатырлатма о куньлерни, о геджелерни,

Атешли учкъан думанлы къумларны.

Агълатма мени, тельчелеме джигерлерни,

Хатырлатма акъсыз, етим къулларны.

Ах, сепме аджджылар, меним ярама,

О, бойле де сызлар, янар, агъыра.

Фурсат бер манъа бир нефес алмагъа,

Ах, аджджылар сепме, меним ярама…

Геджелерни ястыкъ сылатыр козьяшларым,

Куньдюзлери козюм огюнде анам…

Сизге де асретим мен, тувгъан дагъ-ташларым,

Янам, анам, ах, атешлерде янам…

Ах, сепме зеэрлер меним ярама,

Агърысына даяналмам, агъларым.

Фурсат бер манъа юртума къайтмагъа,

Ах, мени беклер чёллерим, дагъларым…