Bilmem,

niçün, yardım etmez ilâclar maña.

O mayıs gecesi kene qozğala.

Yüregim çapalana, qanlarğa bulana,

Qalbimde afatlı yeller sızğıra.

Dayanalmam, aqlıma tüşse, anam,

Tazertme qanlı yaramnı, yalvaram.

Qan qusa yaram, ateşlerde yanam,

Dayanalmam, aqlıma tüşse, anam.

Hatırlatma o künlerni, o gecelerni,

Ateşli uçqan dumanlı qumlarnı.

Ağlatma meni, telçeleme cigerlerni,

Hatırlatma aqsız, yetim qullarnı.

Ah, sepme accılar, menim yarama,

O, böyle de sızlar, yanar, ağıra.

Fursat ber maña bir nefes almağa,

Ah, accılar sepme, menim yarama…

Gecelerni yastıq sılatır közyaşlarım,

Kündüzleri közüm ögünde anam…

Sizge de asretim men, tuvğan dağ-taşlarım,

Yanam, anam, ah, ateşlerde yanam…

Ah, sepme zeerler menim yarama,

Ağrısına dayanalmam, ağlarım.

Fursat ber maña yurtuma qaytmağa,

Ah, meni bekler çöllerim, dağlarım…