Qaruvlı qanatımsıñ,

Düldülim – ür atımsıñ,

Tükenmez ikmetimsiñ,

Baylığım, devletimsiñ,

Qalbimnen birge urğan,

Dünyadan üstün turğan

Vicdanım, namus-arım,

Ğururım, iftiharım –

Aziz yurt, aziz Qırım!

Yüregime sızılğan,

Şuurıma yazılğan

Ğayet dülber resimsiñ,

Parlaq nurlu isimsiñ,

Gürdeli şad sesimsiñ,

Qalbimnen birge urğan,

Dünyadan üstün turğan

Vicdanım, namus-arım,

Ğururım, iftiharım –

Aziz yurt, aziz Qırım!